KK1-2481 - Bainam hkan nu ni sanit (Seven goats)

Transcription (La Ring) Ya ngai hkai na maumwi a gabaw gaw bainam hkan nu ni sanit a lam re ai. Dai bainam hkan nu ni gaw hkan nu ni hkrai sha dum nta langai mi kaw nga rai na ma hkan nau ni hpe tam jaw ai da. Shaloi kanu gaw da kasha ni hpe shat tam jaw na matu nam de sa mat wa na matu kasha ni hpe ga htet da ai kaw "Nu sha nshaga yang, nu sha nwa yang gaw chyinghka hkum hpaw yaw" ngu na tsun da ai shaloi kasha ni gaw chyahkyawn kanu sa shaga ai shaloi gaw kasha ni gaw "Nang nye nu nre ai" "Na nu re le" "Nye nu nre ai nang nye nu rai yang gaw la ta shawn dat yu u taw" nga yang lata shawn dat yang kanu a lata zawn zawn rai na bainam mun shakap la na shawn dat na shan nau ni gaw kam na chyinghka hpaw dat yang hkan nau ni yawng hpe shang sha kau ai da. Shaloi gaw bainam kanu gaw bai wa rai jang kasha ni hpe wa tam hkrap rai yang kasha hpungdim kaji dik ai wa gaw chyinghka jut kaw makoi nga rai na "Ya na hpu ni na ba ni gaw taw" nga yang "Ba ni ahpu ni hpe chyahkyawn kanu sa hta sha kau sai" nga. "Gara kaw gara lam de sa wa sai rai" ngu jang "Wo ra hka kau lam de sa wa sai" ngu rai she hkan nu ga nhtu ni hpe garang la rai na hka kau lam de hkan sa wa yang kan gaw tit tit rai na yup taleng nga ai kaw shan nu lahkawng sa jawm galun sat rai na shan nau ni hpe bai ga shaw la na alum ala rai na bai nga mat ai da. Bainam hkan nu ni a lam chyeju kaba sai. . Language as given: Jinghpaw