KK1-2433 - Grai gumrawng ai shu kanu hte shi a kasha ni (Haughty frog mother and her children)

Transcription (La Ring) Ndai maumwi na gabaw gaw shu kanu hte shi a kashu kasha ni grai gumrawng ai shu kanu hte shi a kasha ni ngu ai re. Moi shawng de da hka la-ing langai mi nga ai da. Dai hka la-ing kaw gaw nga ni ma nga ai zawn dusat dumyeng hka kaw rawng ai tau kawk ni mung nga ai katsu ni mung nga ai da. Dai kaw gaw shu, shu kanu hte shi na shu kasha ni mung nga ma ai da. Rai yang gaw shu kanu gaw shu ni grai naw kaji ai majaw shi na kasha ni hpe shat jaw sha na nga, shat jaw sha na matu shani nga yang gaw shinggan de le hkawm mat mat re ai da. Dai wa lani mi na aten hta gaw da shu kanu wa shinggan de le na lu sha ni hkan tam mat wa, hkan tam hkawm mat wa ai shaloi shu kasha ni gaw hpabaw wa mu ai rai nga yang gaw shanhte na hka makau kaw na garet hkawm wa ai kan kaba... law ai wuloi sumpum mi hpe mu dat ai da. Dai hpe mu kajawng na wa shanhte wa kanu wa wa ai hte tsun dan na hku nga "Anu anu daini anhte ni grai laklai ai lama mi mu ai" ngu di tsun ai da. Dai shaloi "Hpabaw mu ai rai" nga yang "Anu hta grau kaba ai kaba... law ai akawng ni dusat dumyeng ni grai garet lai wa ai" ngu di tsun ai da. Dai majaw shu nga yang gaw chye hte maren kan loi shakat yang kan ni kaba wa chye chye le i. Dai re majaw shi wa grai nna ra na hku nga shi hta kaba ai bai nga re majaw gaw. Dai majaw gaw hkat ti ti sha shi wa loimi tsaw ai shara hpun tawng zawn re kaw wa rawng dung htit rai na wa "Ndai ram kaba ai i" ngu na shi na hkum shi loi mi pa pa rai na loi pawng rai dan ai da dai wa. Ma ni gaw tsun ai da "Ndai hta gaw grau kaba ai" ngu di tsun ai da. Dai shaloi shi gaw "Ndai ram kaba ai i" ngu di loi bai shakat dan ai da. E dai hta mung naw kaba ai law" ngu "Ndai ram kaba i" nga di wa shi na hkum hpe grau bai makan di kaba dat ai. "Dai mung nrai shi ai law" "Ndai ram pawng" nga di "Ndai ram" sha naw nga shi yang shi na hkum shi nau makan ai re nga yang kapaw ga, kapaw ayai mat wa ai da. Dai re ai majaw gaw maumwi chyawm gaw ndai kaw ngut sai. Raitim ndai maumwi kaw na anhte ni sharin la mai ai rai nga yang gaw "Mai dang ndang ai shapre sha ai" nga hpa hpa tinang njin nngut ai hpe gaw arawng mi mala rai di nmai galaw ai ngu hpe e anhte lu sharin la ai law. . Language as given: Jinghpaw