KK1-2849 - Kabai dat na jahkrat dat na (Throwing and dropping)

Transcription (Lu Hkawng) Moi shawng de da, la langai mi Ka-ni ya re da. Ka-ni ya kaba re she bum hkawm nna wa ai she, mare ndu ngut mat ai kahtawng mare kahtawng dingsa langai mi kaw dai kaw hpung kraw ngu ai nga ai, dai nta kaw shi yup mat ai da. Yup ai nga jang gaw Ka-ni kut nna nyep san hkrai kapya wan wut sha ja yup mung n lu makyet na de hpang gaw shana yup tung du jang gaw garap din ntsa kaw na she ''Ngai kabai jahkrat dat sai lu dai lu ndai kabai jahkrat dat na yaw'' ngu da. Rai tim shi gaw zim nga yang she ya nhtoi mahka re loi mi bai yup mai ai ngu jang gaw bai shaga wa ''Ya ngai ndai kadai jahkrat dat sa na lu, dai lu chyu'' ngu ai da. Dai nga jang she ka-ni ya wa gaw ''E kabai nga kabai jahkrat nga jahkrat u, hpa baw wa ma shana tup tup dai chyu chyu tsun nan ngai gaw ka-ni gaw kut ai hte'' ngu nna tsun ai da. Pawt jang she dan ngu jang she ''Jahkrat dat u kabai dat u'' ngu she kaja wa jahkring mi rai yang din nga na she tawng kaba law ai wa mi shi makau dap makau kaw mi jahkrat dat ai da. Jahkrat dat rai yang gaw ndai yup tung hpa-wa lai rai na hku rai nga dai kaw she shi gaw myi sha ga-nun kau nna wan wut nna yu yang gaw magri tawng zawn gaw rai da, rai tim atsawm ti hta da nna she nhtoi htoi sai nga jang gaw man myit nna myi na shi e kabai jahkrat dat ai lung din re ai dai wa yu jang wa she ja tawng wa she bai rai mat da. ''Ke ndai ja tawng she re ai gaw'' ngu nna dai rai hpe majaw nna le lahta kahtawng de lung mat wa ai da. La dai wa lung mat wa rai yang gaw ''Ka-ni ya wa hkai hpa ma majaw gun hkawm n-dai'' ngu jang she ''E hpa re ai n chye ai law shana tup yup pa nlu sha ai, kabai na e jahkrat na e nga shana tup ngai hpe jahkrat na nga nna,ngai mung ga-un nna jahkrat nga jahkrat dat u kabai nga kabai dat u ngu jang gaw ngai gaw magyi zawn zawn shadu shana gaw myi atsawm n mu nna jahpawt rawt yu yang gaw ja tawng wa mi rai ai hka dan re kaw na lu la n ngai re'' ngu ai da. Dan nga jang gaw ''Ga manang pi dan re sahti htai mat sai'' nga nna she langai mi bai dai nta jarawp dai hpung kraw kaw bai wa yup da. Wa yup rai jang gaw dai wa mung ka-ni ya gaw rai ai hku nga rai tim dai kaw wa yup rai yang she dai mung mi na zawn nga ''Jahkrat dat na e nye kabai dat na e'' chyu ngu da. Dan nga jang she shi gaw lahkawng lang ngu na hta gaw ''Kabai nga kabai jahkrat nga jahkrat u'' ngu jang wa she shi hpe kabai sat kau ai da. Dai majaw masha ngu ai gaw manang wa pi a galaw a lu nga nna tinang dan re ai hpe yu yu manawn nna tinang bai hkan jang gaw tinang a asak sum chye ai da. Dai maumwi ndai gaw ndai kaw rai sai, dai majaw manang wa a lai hpe tinang gaw n mai da graw ai manawn ai myit n mai rawng ai da. . Language as given: Jinghpaw