SUG'URTA KOMPANIYALARINING MOLIYAVIY BARQARORLIGINI MUSTAHKAMLASH USULLARI VA INNOVATSION YONDASHUVLAR

Mazkur tezisda sug‘urta tashkilotlarining moliyaviy barqarorligini ta’minlashning nazariy va amaliy jihatlari tadqiq etilgan. Tadqiqotda moliyaviy barqarorlikning iqtisodiy mohiyati, uni shakllantiruvchi asosiy omillar hamda zamonaviy riskka moslashtirilgan boshqaruv yondashuvlari tahlil qilingan. Xususan, kapital yetarliligi, tarif siyosati, qayta sug‘urtalash mexanizmlari, investitsiya faoliyati va kompleks monitoring tizimining sug‘urta tashkilotlari barqarorligidagi o‘rni ilmiy asosda yoritilgan. Shuningdek, xalqaro amaliyotda qo‘llanilayotgan Solvency II tizimi va riskka asoslangan kapital modellari misolida sug‘urta kompaniyalari moliyaviy xavfsizligini ta’minlash mexanizmlari baholangan. Tadqiqot natijasida sug‘urta tashkilotlarining uzoq muddatli moliyaviy barqarorligini ta’minlashda riskka moslashtirilgan kapital siyosati, aktuar asoslangan tarif mexanizmi hamda samarali qayta sug‘urtalash tizimini joriy etish muhim ilmiy-amaliy ahamiyat kasb etishi asoslab berilgan.