COVID-19 ИНФЕКЦИЯСИНИ БОШДАН КЕЧИРГАН ЁШИ УЛУҒ БЕМОРЛАРДА МИОКАРД ИНФАРКТИДАН КЕЙИНГИ 6 ОЙЛИК КЛИНИК НАТИЖАЛАР ВА ҚОЛДИҚ ХАВФНИ БАҲОЛАШ

COVID-19 инфекцияси юрак-қон томир тизимига узоқ муддатли таъсир кўрсатиб, миокард инфарктидан кейинги қолдиқ хавфнинг сақланиб қолишига олиб келиши мумкин. Тадқиқот мақсади COVID-19 инфекциясини бошдан кечирган ёши улуғ беморларда миокард инфарктидан кейинги 6 ойлик клиник натижаларни, MACE кўрсаткичларини ва қолдиқ юрак-қон томир хавфини баҳолашдан иборат бўлди. Тадқиқотга дастлаб 105 нафар бемор жалб қилинди, шундан 60 нафари тадқиқот мезонларига тўлиқ жавоб берган ҳолда асосий таҳлилга киритилди. Барча беморлар 6 ой давомида динамик кузатувга олинди. Тадқиқот давомида клиник баҳолаш, ЭКГ, Холтер мониторинг, эхокардиография, лаборатор текширувлар ва коронарография қўлланилди. 6 ойлик кузатув натижаларига кўра умумий омон қолиш кўрсаткичи 96,7% ни, MACE-сиз омон қолиш эса 75,9% ни ташкил этди. Қайта госпитализация 24,1%, клиник аҳамиятли аритмиялар 20,7%, сурункали юрак етишмовчилигининг жадаллашуви 17,2% ҳолатларда кузатилди. Қолдиқ хавф асосан дастлабки 3 ой ичида намоён бўлган бўлса-да, айрим беморларда кеч шаклланган клиник траекториялар ҳам қайд этилди. Олинган натижалар COVID-19 фонида кечган миокард инфарктидан кейин ёши улуғ беморларда юқори қолдиқ юрак-қон томир хавфи сақланиб қолишини ва ушбу беморларда узоқ муддатли динамик назорат ҳамда индивидуаллаштирилган иккиламчи профилактика муҳим аҳамиятга эга эканлигини кўрсатди.