KK1-2306 - Lalawma hte wa hkyi (Bullies and pig shit)

Transcription (La Ring) La law ma ni hte wa hkyi nga ai gabaw rai nga ai. Ya ndai maumwi gaw anhte Jinghpaw Wunpawng amyu masha ni kaw byin lai mat wa ai hpe e tsun dan na hku re. Ya shawng de mare kahtawng kaba langai kaw e la law ma ni hte jahkrai ma nga ai.. da. Shaloi gaw dai jahkrai ma ngu ai gaw kanu nlu ai kawa nlu ai kawoi dwi hte nga ai jinghku ni hte nga ai ma re. La law ma ngu gaw kanu kawa hkum hkum tsup tsup rai na kahpu kanau grai law ai hpe la law ma ngu ai re. Shawng de dai mare kahtawng kaw la law ma hte jahkrai ma nga ai. Dai kaw dai hku na nga ai shaloi lani mi na nhtoi hta dai ma hpe gaw dai jahkrai ma hpe gaw shanhte ra ai hku shangun, ra ai hku shanhte woi, jaw lu jaw sha ai maga de gaw shi hpe gaw njaw nlu nsha shangun rai na zingri ai lam ni law law hpe shi hkam sha let shi nga lai mat wa ai. Dai ma gaw, jahkrai ma hpe gaw lani mi na nhtoi hta e ndai.. la law ma ni gaw "E.. jahkrai ma e an hpu an nau ni hte nam de sa ga, nam de sa nna shan wa gap ga, wa ndu grai nga ai re wa ndu sa gap ga" ngu nna jahkrai ma hpe saw ai. Shaloi gaw jahkrai ma dai wa gaw "E mai ai" ngu na hkan nang mat wa ai. Shaloi gaw nam de du ai shaloi gaw ndai wa langai hpe lu gap ai. Shanhte wa langai lu gap ai shaloi gaw ndai wa shan hpe gaw shan nau ni yawng garan la nna, dai jahkrai ma hpe gaw "Nan gaw nan dwi sha nga ai re majaw nan dwi gaw ndai pu hte sha law ai, nanhte gaw nang gaw dai pu hte pu she la wa u, anhte gaw masha law ai re majaw gaw ndai shan kaja ni yawng gaw anhte la na re" ngu nna tsun ai. Shaloi dai ma wa gaw grai nkam hkam let hkrap nna she le hka nga ai de wa pu dai ni hpe hpai sa nna dai shi na la law ma ni gaw shan gun nna wa mat, shi gaw dai hka de hkrap nna dai lang sa rai nna wa pu shup ai. Wa hpe wa pu hpe wa hkyi ni shale kau na ngu na e shup na matu sa ai shaloi gaw dai wa pu kaw wa hkyi gaw npru nna ja wa ja pru ai da. Dai aja hpe gaw ja shangwi ni dai hku pru re shaloi gaw shi gaw dai ja hpe wa pu kata kaw na ja hpe mahkawng la nna la mat wa ai da. La mat wa re she dum nta kaw du yang gaw kadwi hpe tsun ai "Adwi e ndai hku wa pu shup shangun ai wa ndai ngai shup ai wa pu kaw wa ja grai rawng nga ai". Re majaw shan kadwi mung grai.. kabu nna nga ai da. Dai kaw she dai ma wa gaw jahkrai ma wa gaw ndai ja ni hpe dut nna she manu mana sahte ai manu mana lau ban e dai hku na byin nna dai mare kaw sahte kaba byin nna nga nga ai da. Dai majaw ma.. jahkrai ma raitim mung anhte ndai roi rip ai lam ngalaw yang gaw e dai zawn i shanhte ma yawng hkra gaw maren hpra di yang gaw shanhte ma ja hpe mung lu na re ngu na maumwi hpe ndai kaw jahtum sai re. . Language as given: Jinghpaw