MULK HUQUQINING BEKOR BO'LISHI VA KOMPENSATSIYA INSTITUTI: NATSIONALIZATSIYA, REKVIZITSIYA VA MUSODARA INSTITUTLARINING HUQUQIY KAFOLATLARI VA AMALIY MUAMMOLARI

Ushbu tezisda mulk huquqining majburiy bekor etilishining uchta asosiy instituti - natsionalizatsiya, rekvizitsiya va musodara – O‘zbekiston Respublikasi qonunchiligi hamda xalqaro huquqiy standartlar asosida qiyosiy-huquqiy tahlil qilingan. Tadqiqot davomida O‘zbekiston Respublikasi Fuqarolik kodeksining 202–204-moddalari, O‘zbekiston Respublikasining 781-sonli “Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida”gi Qonuni hamda xalqaro investitsiya arbitrajida hal etilgan ushbu mavzu bilan bog‘liq ba’zi sud ishlari, xalqaro huquqda mulk huquqini bekor bo‘lish asoslari o‘rganilgan. Mazkur institutlarning huquqiy tabiati, mulkdor huquqlarini himoya qilish mexanizmlari, kompensatsiya to‘lash kafolatlari va amaliyotdagi mavjud huquqiy bo‘shliqlar tahlil etilgan. Tadqiqot yakunida mulk huquqini bekor qilish bilan bog‘liq munosabatlarni tartibga soluvchi milliy qonunchilikni xalqaro standartlar asosida takomillashtirish yuzasidan aniq ilmiy-amaliy takliflar ilgari surilgan.