SUN'IY INTELLEKTGA ASOSLANGAN TA'LIMNING TALABALARNING TANQIDIY FIKRLASHI VA MUSTAQIL TA'LIM OLISH KO'NIKMALARIGA TA'SIRI

Ushbu ilmiy maqolada zamonaviy oliy ta’lim tizimida sun’iy intellekt (SI) texnologiyalarining joriy etilishi, ularning talabalar intellektual salohiyatiga, xususan, tanqidiy fikrlash va mustaqil ta’lim olish ko‘nikmalariga ko‘rsatayotgan ta’siri fundamental va amaliy jihatdan tahlil qilinadi. Tadqiqotning maqsadi SI vositalarining ta’lim jarayonidagi o‘rnini aniqlash hamda ularning talaba kognitiv faoliyatidagi ijobiy va salbiy oqibatlarini baholashdan iborat. Tadqiqot obyekti sifatida oliy ta’lim muassasalari talabalari, xususan, bo‘lajak boshlang‘ich sinf o‘qituvchilarining o‘quv faoliyati olindi. Maqolada tizimli tahlil, qiyosiy pedagogik tahlil va prognozlash metodlaridan foydalanilgan. Olingan natijalar shuni ko‘rsatadiki, sun’iy intellektga asoslangan adaptiv ta’lim platformalari talabalarning mustaqil bilim o‘zlashtirish tezligini 30-40 foizga oshiradi, biroq axborotni tayyor holda qabul qilishga o‘rganish tanqidiy tahlil chuqurligini pasaytirishi mumkin. Maqolada SI muhitida talabalarning tahliliy qobiliyatlarini rivojlantirish bo‘yicha metodik tavsiyalar ishlab chiqilgan. Tadqiqot xulosalari raqamli pedagogika va ta’lim texnologiyalarini takomillashtirishda muhim amaliy ahamiyatga ega.