TEMURIYLAR DAVRI TARIXIY MANBALARIDA SIYOSIY VA IJTIMOIY JARAYONLAR TALQINI

Mazkur maqolada Temuriylar davriga oid tarixiy manbalarda aks etgan siyosiy va ijtimoiy jarayonlarning talqini kompleks tarzda tahlil qilinadi. Tadqiqot jarayonida biz Zafarnoma, Temur tuzuklari, Matla us-sa'dayn va majma'ul-bahrayn kabi asosiy tarixiy manbalarga tayanib, ularning siyosiy legitimatsiya, ijtimoiy tabaqalanish va davlat boshqaruvi masalalarini qanday yoritganini ko‘rib chiqamiz. Shu bilan birga, zamonaviy tarixshunoslik yondashuvlari asosida ushbu manbalarning subyektivligi, ideologik yo‘nalganligi hamda tarixiy haqiqatni aks ettirish darajasi baholanadi. Tahlillar shuni ko‘rsatadiki, Temuriylar davri manbalari ko‘proq hukmdor shaxsini ulug‘lashga xizmat qilgan bo‘lsa-da, ular orqali davrning real siyosiy-iqtisodiy va ijtimoiy jarayonlarini rekonstruksiya qilish imkoniyati mavjud. Maqolada muammo sifatida manbalar talqinidagi biryoqlamalik, tarixiy voqealarning ideallashtirilishi va ijtimoiy qatlamlarning yetarli darajada yoritilmaganligi ko‘rsatilib, ushbu kamchiliklarni bartaraf etish yo‘llari taklif etiladi. Tadqiqot natijalari Temuriylar davrini qayta baholash va tarixiy jarayonlarni chuqurroq anglashga xizmat qiladi.