LACTOBACILLUS BAKTERIYA SHTAMMLARI ASOSIDA QISHLOQ XO'JALIGI ZARARKUNANDA ZAMBURUG'LARIGA QARSHI ANTIFUNGAL TA'SIRGA EGA BIOLOGIK PREPARAT ISHLAB CHIQISH ISTIQBOLLARI

Mazkur maqolada qishloq xo‘jaligi ekinlariga zarar yetkazuvchi fitopatogen zamburug‘larga qarshi biologik kurash vositasi sifatida Lactobacillus avlodiga mansub bakteriyalar asosida antifungal preparatlar yaratish istiqbollari tahlil qilindi. Kimyoviy fungitsidlarning ekologik xavfi, tuproq mikrobiotasiga salbiy ta’siri va patogenlarning rezistentlik hosil qilishi biologik preparatlarga bo‘lgan ehtiyojni oshirmoqda. Tadqiqotlarda Lactobacillus plantarum, Lactobacillus casei, Lactobacillus fermentum kabi shtammlarning Fusarium oxysporum, Aspergillus flavus, Penicillium expansum, Botrytis cinerea va boshqa fitopatogen zamburug‘larga qarshi sezilarli antagonistik faollikka ega ekanligi aniqlangan. Ushbu bakteriyalar tomonidan ishlab chiqariladigan organik kislotalar, bakteriotsinlar, vodorod peroksid va siklik peptidlarning antifungal mexanizmlari yoritilgan. Maqolada biologik preparatlarni ishlab chiqarish texnologiyasi, fermentatsiya jarayonlari, preparatning barqarorligi hamda qishloq xo‘jaligida qo‘llash imkoniyatlari ilmiy manbalar asosida bayon etilgan.