KK1-2112 - Shalawa hte hkawhkam kasha na lam (Prince and man-eating giant)

Shalawa hte num kasha a lam tsun na re. Mungdan hkawhkam wa na shayi sha gaw grai tsawm ai dai shaloi she hkawhkam wa gaw shi kaw grai tsawm ai kasha langai lu ai da. Dai hkawhkam hkaw na ora maga de gaw bum kaba langi nga ai da, dai kaw shalawa wa nga ai da. Shalawa nga rai shaloi she shalawa gaw dai hkawhkam shayi sha hpe yu ra na she masha zawn zawn di na she shi dai hku galaw na sa ai da. Sa rai shaloi she shi kaw gaw atsam ni grai nga ai shalawa rai nga dai hku rai na she, shi gaw dai hku atsam madun rai shaloi she hkawhkam wa grai ra sha mat na shi kasha na sak sin galaw kau ai da. Sak sin dai hku tawn kau ai shaloi she, hkawhkam shayi sha hpe she dai shalawa wa gaw yup tsi jaw sha na she shi na shalawa na lung pu hku de woi mat wa ai da. Shalawa lungpu hku de woi mat rai she shalawa kaw gaw masha asak bai jahkrung la ai hpan nat lung seng lu ai da. Dai shaloi she shi gaw dai hkawhkam shayi sha hprawng mat na hkrit na she shi gaw abaw hpe di la na hka shin shin rai ai da. Dai hpe she dai hkawhkam shayi sha na baw hpai mat wa na hka kaw she hkawhkam shayi sha na sai pru hpe she (padi) dai hpan byin mat ai da. Dai shaloi she, dai (padi) byin ai shaloi she hka kaw dai hku rawng mat ai da grai kabrim grai htoi na rawng ai da, dai shaloi hkawhkam shadang sha langai mi gaw dai hku shan gap hkawm ai kaw hka grai lu mayu na dai wa lu yang me hka dai gaw grai kabrim taw ai da. Grai kabrim taw na she, shi gaw hta yu yang she dai (padi) rai taw na she, shi gaw ndai hka kaw ndai ram ram rawng ai gaw kaning rai kun ngu na she hpang shani bai yu yang she dai shalawa wa she dai hkawhkam shayi sha na baw bai hpai sa wa ai da. Dai kaw na sai wa she dai (padi) bai byin mat rai yang she, shalawa wa hka shin ngut na she dai shalawa na lungpu hku de bai wa ai shaloi dai hkawhkam shadang sha wa hkan lagu yu ai da. Hkan lagu yu shaloi she dai shi na baw wa she hkawhkam shayi sha hpe bai shakap dat ya shaloi grai tsawm ai da hkrap hkrai hkrap na nga taw ai da. Dai hpe mu ai shaloi shana rai shaloi dai shalawa wa yup yaw shaloi sa lagu san ai da hkawhkam shayi sha hpe nang hpa rai na i ndai hku nyin mat ai rai ngu tsun ai shaloi hkawhkam shayi wa gaw tsun dan ai da. Dai shaloi she hpang jahpawt du shaloi she tsun sai da dai hkawhkam shayi sha wa gaw nyan sai da, e nang ngai hpe kaja ra yang gaw nang hte an hkung ran ga ngu dai hku ngu tsun ai da. E dai hkun ran na re majaw ya gat de i hkun ran na shaloi hpun na bu hpun palawng sa mari na matu nang bu hpun palawng naw galai kau dat u ngu tsun ai da. Dai shaloi she bu hpun palawng galai ngut na wa shaloi she, dai hkawhkam kasha wa sa na she dai shi na nat lung seng dai ma lagu la na hkawhkam shayi sha hpe ma woi lagu hprawng mat wa ai da. Dai shaloi she, dai shalawa wa buhpun palawng galai ngut na bai pru wa shaloi gaw dai shi grai shi na asak hta pyi grau manu shadan ai dai nat lung seng dai ma mat mat, hkawhkam shayi sha ma mat mat na grai yawn na si mat ai da. Dai shalawa wa, ngut na dai hkawhkam shayi sha hte hkawhkam shadang sha gaw shanhte na mungdan de kawa hpe dai lam ni wa tsun dan shaloi hkawhkam shadang sha hpe grai chyeju dum ai hte shan lahkawng hpe dai hku jaw sha kau ai da. . Language as given: Jinghpaw