QAYTA SUG'URTA UNDIRISHLARI VA LIKVIDLIK: TESKARI STRESS SINOVI

Qayta sug‘urta zarar oqibatini kamaytirishi mumkin, biroq undiruvning kechikishi sug‘urtalovchining joriy to‘lov imkoniyatini cheklaydi. Tadqiqotda aktivlarning pulga aylanishi va qayta sug‘urta undirishlarini birlashtiruvchi 30 kunlik shartli model ishlab chiqildi. O‘zbekiston sug‘urta bozorining 2025-yil investitsiya tarkibi hamda to‘langan zararlar nisbati miqyoslashtirish uchun qo‘llandi; ssenariy parametrlari kuzatilgan kompaniya ma’lumotlari sifatida berilmadi. 100 mlrd so‘mlik investitsiya portfeli uchun tayanch, kuchaygan va og‘ir ssenariylarda pul qoldig‘i mos ravishda 11,97; 3,28 va −3,40 mlrd so‘mni tashkil etdi. Og‘ir ssenariyda 30 kunlik undirishni 100 foizgacha tezlashtirishning o‘zi taqchillikni bartaraf etmaydi: hisoblangan zarur daraja 134,12 foiz bo‘lib, mumkin bo‘lgan chegaradan yuqori. Boshqa shartlar o‘zgarmaganda depozitlarning foydalanish mumkin bo‘lgan qismi 3 foizdan kamida 8,37 foizga yetishi talab etiladi. Teskari stress sinovi orqali imkonsiz chorani amaliy choradan ajratish usuli taklif qilinadi. Natijalar moliyaviy inqiroz ehtimoli yoki alohida tashkilot reytingi emas, ochiq farazlar ostidagi hisoblash natijasidir.