ISLOMIY BANKCHILIK TAMOYILLARI, XALQARO TAJRIBALAR VA O'ZBEKISTONDA RIVOJLANTIRISH ISTIQBOLLARI

Ushbu maqolada islomiy bankchilik tizimining asosiy tamoyillari, uning an’anaviy bankchilikdan farqli jihatlari, qo‘llaniladigan moliyaviy instrumentlar va xalqaro tajribalar tahlil qilinadi. Islomiy moliya foiz (ribo), noaniqlik (g‘arar) va qimor (maysir) elementlaridan xoli bo‘lib, real aktivlarga asoslangan va foyda-zararni taqsimlash tamoyiliga tayanadi. Maqolada Malayziya, Birlashgan Arab Amirliklari, Pokiston va Buyuk Britaniya tajribalari o‘rganilib, Islom darchalari tizimining samaradorlik omillari aniqlangan. Shuningdek, O‘zbekistonda islomiy moliyani rivojlantirishning huquqiy, institutsional va kadrlar tayyorlashga oid istiqbollari yoritilgan. Ayniqsa, 2026-yil 27-martda qabul qilingan O‘RQ–1126-sonli “Banklar va bank faoliyati to‘g‘risida”gi qonunga o‘zgartirish va qo‘shimchalar kiritish haqidagi qonun tahlil qilinib, unda Markaziy bankning Islomiy moliya kengashi, banklarning Islomiy moliya kengashi, ikki turdagi litsenziya tizimi va islomiy moliya operatsiyalarining huquqiy asoslari yoritilgan. Xulosa qilib aytganda, islomiy bankchilik nafaqat musulmon aholining ehtiyojlarini qondirish, balki moliyaviy inklyuzivlikni oshirish va iqtisodiyotni diversifikatsiya qilishda muhim omil sifatida xizmat qilishi mumkin.