ARAB MATBUOTI SARLAVHALARIDA STILISTIK VOSITALAR VA ULARNING KOMMUNIKATIV-PRAGMATIK VAZIFALARI

Maqolada zamonaviy arab matbuoti sarlavhalarida qo‘llaniladigan stilistik vositalar va ularning kommunikativ-pragmatik vazifalari tahlil qilinadi. Tadqiqot materiali sifatida “Al-Sharq Al-Awsat”, “Al-Youm” va “Al-Youm Al-Sabi” gazetalarining elektron nashrlaridan tanlangan 220 ta arabcha sarlavhadan shakllantirilgan korpusdan foydalanildi. Amaliy materialda uchragan takror, parallelizm, tazod, maqol, mashhur ibora, Qur’oniy iqtibos, hadisga ishora, intertekstual birliklar hamda ekspressiv-metaforik ifodalar stilistik va kontekstual tahlil qilindi. Tahlil natijalari mazkur vositalar sarlavhada faqat obrazlilik hosil qilmasdan, axborotning muayyan komponentini oldinga chiqarish, semantik ziddiyatni kuchaytirish, madaniy va diniy assotsiatsiyalarni faollashtirish hamda o‘quvchi e’tiborini asosiy matnga yo‘naltirish vazifalarini bajarishini ko‘rsatadi. Shuningdek, intertekstual birliklarning kommunikativ samarasi auditoriyaning lingvomadaniy kompetensiyasiga bog‘liq ekanligi aniqlanadi.