ChatGPT-4V en lugfoto's

Die doel van die ondersoek was om die implikasies vir die praktyk te bepaal indien ChatGPT-4V lugfoto’s kan ontleed, ‘n doel wat binne die raamwerk van verkennende gevallestudie bereik is. Vir die doel van die ondersoek is tien gesprekke met ChatGPT-4V gevoer om te bepaal of dit lugfoto’s kan ontleed en oor genoegsame geografiese kennis beskik om die response te verdedig. Daar is bevind dat ChatGPT-4V belangrike implikasies vir die praktyk inhou omdat dit lugfoto’s redelik suksesvol kan ontleed, oor geografiese kennis beskik en berekeninge kan maak, maar ChatGPT-4V het ook foute gemaak en nie herken dat dit foute gemaak het nie. Inteendeel; dit het probeer oortuig dat die response korrek was. Gebaseer op die bevindinge is afgelei dat ChatGPT-4V bruikbaar en misbruikbaar in Geografie-klaskamers is, daarom behoort beleid en strategieë in plek te wees om verantwoordelike gebruik van hierdie kunsmatig-intelligente hulpmiddel te bevorder.