MAHALLA — TADBIRKORLIK VA HUNARMANDCHILIK TARAQQIYOTINING MUSTAHKAM TAYANCHI

Mahalla xalqimiz hayotida hamjihatlik, mehr-oqibat va o‘zaro ko‘mak timsoli bo‘lib kelgan. Bugungi taraqqiyot jarayonida uning mazmuni yanada boyib, mahalla aholi tashabbuslari amaliy loyihaga aylanadigan, yangi ish o‘rinlari yaratiladigan, oilaviy daromadlar ko‘payadigan va milliy hunarlar zamonaviy bozor bilan uyg‘unlashadigan iqtisodiy makon sifatida namoyon bo‘lmoqda. Mahallaning eng katta ustunligi — har bir xonadonning qobiliyati, kasbiy tajribasi, mehnat resursi va ehtiyojlari mahalla miqyosida yaxshi ma’lum ekanidir. Shu yaqinlik tufayli tadbirkorlik g‘oyasini hududning real salohiyati, mahalliy talab va mavjud resurslar bilan bog‘lash mumkin.