INTERFAOL METODLAR ORQALI ESL O'QUVCHILARINING TINGLAB TUSHUNISH KO'NIKMASINI RIVOJLANTIRISH METODOLOGIYASI

Ushbu tezisda ESL (ingliz tili ikkinchi til sifatida) o‘quvchilarining tinglab tushunish ko‘nikmasini rivojlantirishda interfaol metodlarning samaradorligi tahlil qilinadi. Tinglab tushunish real muloqotning asosi bo‘lib, ko‘plab ESL o‘quvchilari uchun eng qiyin ko‘nikmalardan biri hisoblanadi. An’anaviy passiv tinglash mashg‘ulotlari o‘rniga interfaol metodlar – jumladan, jigsaw listening, dictogloss, intervyu va guruhli muhokama, onlayn interfaol platformalar (LyricsTraining, ESL Lab, YouGlish) hamda rolli o‘yinlar – o‘quvchilarning diqqatini faollashtiradi, kutilmagan javob va fikr bildirishga undaydi. Tadqiqot shuni ko‘rsatadiki, interfaol metodlar asosida tashkil etilgan darslarda o‘quvchilarning real vaziyatlarda so‘zlangan nutqni tushunish, asosiy ma’lumotni ajratib olish va noverbal elementlarni izohlash qobiliyati sezilarli darajada oshadi. Metodologiya quyidagi bosqichlarni o‘z ichiga oladi: tinglash oldi (faollashtirish), tinglash davri (interfaol topshiriqlar), tinglashdan keyingi bosqich (muloqot va refleksiya). Tavsiya etilgan yondashuv ESL o‘quvchilarining tinglash motivatsiyasini oshirish, xatolarga nisbatan bag‘rikenglikni shakllantirish va kommunikativ kompetensiyani kompleks rivojlantirishga xizmat qiladi.