ҚИШЛОҚ ХЎЖАЛИГИ МОДДИЙ-ТЕХНИКА РЕСУРСЛАР БОЗОРИНИ ТАКОМИЛЛАШТИРИШ

Агросаноат комплексининг муҳим таркибий қисмидан бири кишлоқ хўжалигидир. Ушбу тармоқда ишлаб чиқариш самарадорлигини аниқлаш муҳим аҳамият касб этади. Ишлаб чиқариш самарадорлигига таъсир этувчи омиллар икки гуруҳга бўлинади: а) ишлаб чиқариш омиллари; б) бозор муносабатлари омиллари. Ишлаб чиқариш омилларига ер ресурслари, сув ресурслари, меҳнат ресурслари, асосий воситалар, айланма маблағлар ва бошқа омиллар киради. Бозор муносабатлари омилларига шу бозор коньюктурасининг ҳолати, истиқболи, унинг динамикаси, рақобат шароитлари ва кўлами киради. Бошқача қилиб айтганда, бозор омилларига — маҳсулотнинг баҳоси, унга бўлган талаб ва таклиф, рақобатдаги маҳсулотлар миқдори, рақобатчиларнинг бозор сиёсати ва бошқалар киради.