İQTİSADİ ZONALARDA MƏSKUNLAŞMA SIXLIĞININ KORELYASİYASINA SƏNAYE ZONALARININ TƏSİRİ

Məskunlaşma sıxlığı müəyyən bir ərazi vahidində yaşayan əhalinin sayını ifadə edən demoqrafik göstəricidir. İqtisadi zonalar isə ümumi sosial-iqtisadi, coğrafi və inzibati xüsusiyyətlərinə görə qruplaşdırılmış ərazilərdir. Məskunlaşma sıxlığı iqtisadi fəaliyyətin miqyasına, infrastrukturun inkişaf səviyyəsinə, sosial xidmətlərin əlçatanlığına və təbii-coğrafi şərtlərə bağlı olaraq fərqli şəkildə formalaşır. İqtisadi coğrafiyada məskunlaşma sıxlığının analizi sosial-iqtisadi inkişafın göstəricilərindən biri kimi çıxış edir. Məskunlaşma və iqtisadi göstəricilər arasında əlaqənin öyrənilməsi korelyasiya təhlili ilə aparılır. Zonaların korelyasiyasına nəzər salarkən bu ərazilərdə yaradılan sənaye parkları və s. infrastruktur layihələrini də diqqətdə saxlamaq olduqca vacibdir. Xüsusilə, sənaye zonalarının yerləşdiyi ərazilərdə məskunlaşmanın dinamikası və əhali axınları daha aktiv xarakter daşıyır. Bu zonalar həm də yeni iş yerləri yaradaraq regionların sosial-iqtisadi strukturunun formalaşmasına mühüm təsir göstərir.