TIZIMLI QIZIL YUGURIK KASALLIGIDA TERINING ZARARLANISHI

Tizimli qizil yugurik (TQY) — immun tizimining disregulyatsiyasi, autoantitanalar hosil bo‘lishi va immun komplekslar shakllanishi bilan kechuvchi surunkali autoimmun kasallik bo‘lib, turli a’zolar, jumladan teri zararlanishi bilan namoyon bo‘ladi. Teri belgilarining klinik ko‘rinishi kasallikning faolligi, davomiyligi va tizimli zararlanish darajasini baholashda muhim ahamiyatga ega. TQYda teri zararlanishlari o‘ziga xos va o‘ziga xos bo‘lmagan ko‘rinishlarga bo‘linadi. O‘ziga xos teri belgilariga o‘tkir, yarim o‘tkir va surunkali teri lupuslari kiradi. Malar toshma, diskoid toshmalar, fotosensitivlik, soch to‘kilishi, og‘iz bo‘shlig‘i yaralari, vaskulyar o‘zgarishlar va Reyno fenomeni klinik amaliyotda muhim ahamiyatga ega. Adabiyot ma’lumotlariga ko‘ra, TQY bilan kasallangan bemorlarning 70–85 foizida kasallikning ma’lum bosqichida teri belgilarining kuzatilishi mumkin [1]. Mazkur tezisda TQYda terining zararlanish shakllari, ularning klinik ahamiyati, diagnostik imkoniyatlari va zamonaviy tasniflash mezonlari tahlil qilinadi.