QISHLOQ MAKTABLARI YUQORI SINF O'QUVCHILARINI VATAN MUDOFAASIGA TAYYORLASH BOSQICHIDA JISMONIY SIFATLAR VA ULARNI TARBIYALASH

Tadqiqotning maqsadi qishloq maktablaridagi yuqori sinf o‘quvchilarining jismoniy sifatlarini rivojlantirish va ularni Vatan mudofaasiga tayyorlash jarayonini chuqur tahlil qilishdan iborat. Pedagogik kuzatishlar, xronimetrlash va maxsus mashg‘ulotlar tadqiqot metodlari sifatida ishlatildi. Umumiy hisobda 250 dan ortiq darslar va mashg‘ulotlar kuzatildi, natijada mavjud mashg‘ulotlarning jadalligi va davomiyligi yetarli darajada emasligi aniqlandi. Bu, o‘z navbatida, o‘quvchilarning jismoniy tayyorgarligiga salbiy ta’sir ko‘rsatmoqda. Tadqiqot natijalari shundan iboratki, qishloq maktablarida amalga oshirilayotgan jismoniy mashg‘ulotlarning samaradorligini oshirish uchun yangi metodlar va vositalar joriy etilishi zarur. Xulosa qilib aytish mumkinki, tizimli yondashuv va maqsadli mashg‘ulotlar yoshlarning jismoniy sifatlarini yaxshilash va ularni kelajakda Qurolli Kuchlar safida xizmat qilishga tayyorlashda muhim ahamiyat kasb etadi.