VATANPARVARLIK VA MA'RIFATPARVARLIK G'OYALARINING TARIXIY ILDIZLARI VA ULARNING ZAMONAVIY TA'LIM TIZIMIDAGI AHAMIYATI

Ushbu maqola vatanparvarlik va ma’rifatparvarlik g‘oyalarining tarixiy ildizlarini tahlil qiladi hamda ularning zamonaviy ta’lim tizimidagi pedagogik ahamiyatini o‘rganadi. Tadqiqot davomida Sharq mutafakkirlari (Yusuf Xos Hojib, Mahmud Qoshg‘ariy), jadid ma’rifatparvarlari (Abdulla Avloniy) va zamonaviy pedagogik nazariyalar asosida vatanparvarlik va ma’rifatparvarlik g‘oyalarining dialektik birligi aniqlanadi. Tadqiqot metodologiyasida tarixiy-komparativ, kontent-tahlil, tizimli yondashuv, aksiologik va pedagogik modellashtirish metodlari qo‘llanilgan. Natijalar shuni ko‘rsatdiki, vatanparvarlik hissi faqat ma’rifiy asos bilan boyitilganda shaxsning ijtimoiy faolligi va fuqarolik mas’uliyati shakllanadi. Tadqiqot shuningdek, zamonaviy ta’lim jarayonida vatanparvarlik va ma’rifatparvarlikni uyg‘unlashtirgan pedagogik modelni ishlab chiqish imkoniyatini ilmiy jihatdan asoslaydi. Ushbu maqola pedagogika nazariyasi va tarixi, fuqarolik tarbiyasi, hamda milliy va umuminsoniy qadriyatlarni uyg‘unlashtirish bo‘yicha ilmiy tadqiqotlar uchun nazariy va amaliy hissa hisoblanadi.