KIBERJINOYATCHILIKKA QARSHI KURASHDA DAVLATLARNING XALQARO-HUQUQIY HAMKORLIGI

Ushbu maqolada kiberjinoyatchilikka qarshi kurashda davlatlarning xalqaro-huquqiy hamkorligi masalalari tadqiq etilgan. Kiberjinoyatchilikning transmilliy va chegarasiz tabiati uni global xavfsizlikka jiddiy tahdidga aylantirib, davlatlar, yuridik shaxslar hamda jismoniy shaxslarga katta miqdorda moddiy va ma’naviy zarar yetkazmoqda. Shu munosabat bilan Yevropa Kengashining 2001 yilgi Budapesht Konventsiyasi hamda 2025 yilda Xanoy shahrida imzolangan BMTning Kiberjinoyatchilikka qarshi Konventsiyasi xalqaro-huquqiy tartibga solishning asosiy manbalari sifatida tahlil qilingan. Tadqiqotda solishtirma-huquqiy, tizimli va tahliliy metodlardan foydalanilib, xalqaro konvensiyalar normalari, shuningdek, Yevropa Kengashi, BMT va UNODC ma’lumotlari o‘rganilgan. Tahlil natijalariga ko‘ra, 2025 yil holatiga Budapesht Konventsiyasiga 81 ta davlat a’zo bo‘lib, BMTning yangi Konventsiyasiga esa 74 ta davlat imzo chekkanligi aniqlangan. Shu bilan birga, xalqaro hamkorlik samaradorligini oshirish uchun protsessual yordam mexanizmlarini takomillashtirish, elektron dalillar almashuvini soddalashtirish hamda davlatlar o‘rtasida tezkor axborot almashuv tizimini mustahkamlash zarurligi asoslab berilgan. Tadqiqot natijalari kiberjinoyatchilikka qarshi kurashda xalqaro shartnomalar samaradorligini oshirishga xizmat qiladi.