"IGNORANTIA JURIS NON EXCUSAT" TAMOYILI: ZAMONAVIY HUQUQDA QONUNNI BILMASLIKNING HUQUQIY OQIBATLARI

Ushbu maqolada antik Rim huquqshunosligidan buyon universal huquqiy doktrina sifatida amal qilib kelayotgan “Ignorantia juris non excusat” (Qonunni bilmaslik uzr hisoblanmaydi) tamoyilining zamonaviy huquqiy tizimlardagi o‘rni, uning nazariy va amaliy jihatlari chuqur ilmiy tahlil qilingan. Tadqiqotda yangi tahrirdagi O‘zbekiston Respublikasi Konstitutsiyasi, milliy jinoyat va ma’muriy javobgarlik to‘g‘risidagi qonunchilik normalari hamda xorijiy mamlakatlar (kontinental va anglosakson) huquqiy tajribasi qiyosiy o‘rganilgan. Axborot-kommunikatsiya texnologiyalari va raqamlashtirish (Lex.uz) jadal rivojlangan davrda huquqiy bilimsizlikning subyektiv hamda obyektiv omillari, huquqiy fiksiya va prezumpsiya tushunchalari doirasida baholangan. Maqola yakunida fuqarolarning huquqiy madaniyati va savodxonligini oshirish bo‘yicha ilmiy-amaliy takliflar ilgari surilgan.