KK1-0330 - Kasha hkan nu ni a maumwi (The bad child)

Transcription (La Ring) Rai jang gaw ndai kashu kasha sharin shut kau ai sharin ten e nsharin kau ai kashu kasha hkan nu ni a maumwi re ndai. Moi shawng de e gaida hkan nu ni nga ai da. Gaida hkan nu ni nga jang gaw yak na rai nga i. Sha mayu ai ra ai ni gaw kasha gaw masha ni hkan na mung la wa. Njaw ai mung la wa mu hta la lagu nna mung la wa rai na nga. Dai shaloi she ndai kanu gaw kasha lagu nna la wa tim nyawp la kau, jaw dat ai mung la kau dai hku na kasha hpe she hpa la wa tim ndaru ai da npawt ai da nsharin ai da. "Ma e dai hku hkum di hkum rai dai gaw masha ni na dai hku ngalaw ai baw re nla ai baw re" ngu ntsun rai jang gaw ma dai gaw htaw masha ni a rai la wa lagu wa hpa rai wa ai dai majaw gaw lani hte lani gaw kaba wa jang gaw lata man mat sai akyang nga mat wa ai. Rai jang she ma dai gaw lani mi gaw masha ni a nga sa lagu hkrup ai da. Sak kaba wa jang gaw kaba ai baw lagu wa na sha rai nga. Dai nga sa lagu ai she ndai nga madu ni gaw pya da ni hpe tsun nna she ma dai hpe rim. Rim na she yu shi hpe lu rim jang gaw lang hte lang lagu ai gaw paw wa na sha rai nga. Rai jang gaw ndai ma ndai gaw e htawng de hkyuk de du ram mat wa ai. Rai jang she le hkyuk de htawng de tawn da bang da shang wa na shaloi "Nye nu hpe naw shaga ya mi law ngai nye nu hpe e naw tsun dan na naw lu nngai" ngu na "Nye nu hpe e naw shaga ya mi" ngu tsun jang she ndai pya da ni gaw kanu hpe wa shaga ya ai da. Dai shaloi she kanu ndai ma gaw kanu hpe ning di ahpum la nna kanu na na kawa di kau ya ai da. Dai na kawa di kau ya jang she "Nang hpa rai na na nnu na na kawa di ai rai" ngu san jang she "Ngai ndai daini nanhte rim nna htawng de bang ram hkra re mara lu ai gaw nye nu ngai hpa lagu wa tim mung nhta ai npawt ai dai majaw ngai gaw lagu na la wa yang mai ai baw shadu na daini ngai nanhte rim na htawng de bang ai du hkra ngai ndai hpe ning rai wa ai baw re nchye ai nye nu nsharin ai majaw ngai htawng de du mat wa ra ai re" ngu tsun ai da. Dai shaloi ma gaw nrawng sa kanu hpe mahtang htawng kaw bang kau ai da. Dai majaw ma ngu hpe nkaja ai lam hta e njaw ai lam hta e kanu kawa ni gaw i sharin ra shadum ra ai gaw nmai lagawn nmai hpang hkrat ai ngu ga lachyum gaw ndai hte kaw rai sai. . Language as given: Jinghpaw