O'ZBEK SHE'RIYATIDA IJTIMOIY LIRIKANING SHAKLLANISHI VA TADRIJI

Har qanday milliy adabiyot o‘z davri ijtimoiy hayotining badiiy solnomasidir. She’riyat esa bu solnomaning eng ta’sirchan, eng samimiy sahifalarini tashkil etadi. Zero, lirika inson qalbining bevosita ifodasi bo‘lgani bois jamiyatda kechayotgan evrilishlar, xalq dardi va orzu-armonlari, davr ma’naviy muhitidagi o‘zgarishlar avvalo she’riyatda o‘z aksini topadi. O‘zbekiston mustaqillikka erishgach, milliy adabiyotimiz, xususan, she’riyatimiz uchun mutlaqo yangi tarixiy sharoit vujudga keldi: so‘z erkinligi ta’minlandi, mafkuraviy tazyiqlar barham topdi, ijodkor o‘z xalqi taqdiri, jamiyat muammolari haqida ochiq va dadil fikr yuritish imkoniga ega bo‘ldi. Ana shu tarixiy imkoniyat zaminida ijtimoiy lirika sifat jihatidan yangi bosqichga ko‘tarildi.