BUDJET JARAYONIDA MOLIYAVIY NAZORATNI TARTIBGA SOLUVCHI QONUNCHILIK: HUQUQIY TAHLIL VA TAKOMILLASHTIRISH MASALALARI

Mazkur maqolada O‘zbekiston Respublikasida budjet jarayonida moliyaviy nazoratni tartibga soluvchi milliy qonunchilik tizimi, uning huquqiy asoslari, moliyaviy nazorat subyektlari va obyektlari, nazorat shakllari hamda budjet intizomini ta’minlash mexanizmlari tahlil qilinadi. Tadqiqotda O‘zbekiston Respublikasining Budjet kodeksi, “O‘zbekiston Respublikasining Hisob palatasi to‘g‘risida”gi Qonuni, davlat budjetini tuzish va ijro etish qoidalari hamda 2025–2030-yillarda davlat moliyasini boshqarish tizimini takomillashtirish strategiyasi asosiy normativ manbalar sifatida o‘rganildi. Shuningdek, xalqaro standartlardan, xususan, INTOSAI tomonidan ishlab chiqilgan ISSAI 400 “Compliance Audit Principles” talablaridan foydalanilgan holda milliy tartibga solish mexanizmlari qiyosiy-huquqiy jihatdan tahlil qilindi. Tadqiqot natijasida O‘zbekistonda budjet jarayonida moliyaviy nazoratning huquqiy bazasi shakllanganligi, shu bilan birga, uni xavfga asoslangan yondashuv, ichki nazorat, ichki audit va muvofiqlik mexanizmlari bilan yanada uyg‘unlashtirish zarurligi asoslantiriladi.