QOVOQQA TASVIR ISHLASH: XALQ AMALIY SAN'ATINING EKOLOGIK VA ESTETIK RENESSANSI

Maqolada tabiiy material bo‘lgan qovoq yuzasiga qayta ishlov berish asosida yaratilgan ijodiy namunalarining estetik, madaniy va ekologik ahamiyati ilmiy yondashuv asosida tahlil qilinadi. Sharq miniatyura san’atiga xos tarixiy va estetik tamoyillar zamonaviy san’atda ekologik qarashlar bilan uzviy bog‘liqlikda o‘rganildi. Qovoq xalq amaliy san’atida qadimdan maishiy, ramziy mazmunga ega bo‘lgan tabiiy material sifatida baholanib, uning san’at asari sifatida qayta talqin etilishi ilmiy jihatdan asoslab berildi. Olingan natijalar qovoqqa ishlangan ijodiy yondoshuvlar an’anaviy Sharq miniatyura san’atining mantiqiy davomi bo‘lib, milliy estetik tafakkur, ekologik barqarorlik va zamonaviy badiiy izlanishlarni o‘zida mujassam etgan mustaqil san’at yo‘nalishi sifatida shakllanib borayotganini ko‘rsatadi. Maqola xalq amaliy san’ati, ekologik dizayn hamda san’at ta’limi sohalari uchun nazariy va amaliy jihatdan muhim ahamiyatga ega.