O'PKA TUBERKULYOZI KASALLIGINING ZAMONAVIY DIAGNOSTIKASI VA OLDINI OLISH USULLARI

Ushbu maqolada sil kasalligining (tuberkulyoz) global epidemiologiyasi, patogenezi, diagnostikasi va davolash muammolari keng yoritilgan. Dunyo miqyosida sil kasalligi hali ham eng dolzarb yuqumli kasalliklardan biri bo‘lib, har yili millionlab yangi holatlar va o‘limlar qayd etiladi, ularning asosiy qismi rivojlanayotgan mamlakatlarga to‘g‘ri keladi. Ayniqsa, ko‘p dori-darmonlarga chidamli va keng qamrovli chidamli shakllarning paydo bo‘lishi kasallikni nazorat qilishni murakkablashtirmoqda. Maqolada o‘pka sil kasalligining patogenezi, granuloma hosil bo‘lishi, immun javob mexanizmlari va bakteriya populyatsiyasining geterogenligi muhim ilmiy asos sifatida ko‘rib chiqilgan. Diagnostika usullari sifatida tuberkulin sinamasi, interferon-gamma testlari, rentgenologik tekshiruvlar va bakteriologik hamda molekulyar usullar tahlil qilingan. Davolashda antibiotik terapiya asosiy o‘rin tutadi, biroq ayrim asoratli holatlarda jarrohlik aralashuvi ham muhim ahamiyat kasb etadi.